«Digl oxigen tier igl organismus.»
Drova ei la gesetta «Catschadur Grischun»?
Quella damonda han ins tschentau naven dil pult digl oratur anora a caschun dalla davosa radunonza da delegai. Ei setractava dil tema pertuccont igl alzament dil prezi pigl abonnament. La lavur dalla redaczuiun dalla gasetta ha il plidader medemamein criticau. Sin la damonda, sch’ei drovi aunc il «Catschadur Grischun», e pertuccont la critica enviers la redacziun hai jeu retschiert entgins resuns. Igl ei endretg sche quella damonda fatschenta nus. Con impurtonta ei la gasetta per nus e tgei valeta ha ella per nus?
In privilegi
Gia avon 111 onns savevan nos antenats pertgei ch’ei drovi il «Catschadur Grischun» sco cunterpeisa enviers la pressa quotidiana. La naschientscha dil «Catschadur Grischun» ei succedida duront in grev temps da pupira. La finamira ei stada quella da mantener la libra catscha grischuna. Pertuccont quella tematica cussegliel jeu la scartira giubilara «100 onns BKPJV/ catscha e selvaschinas oz ed il catschadur grischun d’antruras». Tgi che legia il cudisch sur dil svilup dil BKPJV e sur dalla catscha grischuna ei franc perschuadius che la gasetta «Catschadur Grischun» survescha sco aveina principala per il manteniment ed il svilup dalla catscha grischuna. En quella aveina flessegian colligiaziuns che cuntegnan oxigen respectivamein el senn surplidau che vivificheschan igl entir organismus. Dapi la fundaziun ein 1328 ediziuns cumparidas cun tematicas actualas ed infoprmaziuns secundaras sur da politica da catscha e biologia naturala aschia ch’ins sa far in agen meini. Dapi 1328 ediziuns savein nus s’informar meinsilmein sur dalla catscha e natira grischuna, sediscussionar, agir communicativamein e reagir sch’ei fa basegns. Nua dat ei zatgei aschia? Negliu en Svizzera, 12 ediziuns substanzialas per in abonnament annual da mo 45 francs.
Tgi che enconuscha la historia da nossa gasetta
pertuccont la direcziun dalla redacziun, sa che quei pensum semegliava avon il temps dalla direcziun actuala in sez catapultabel. Legreivlamein s’audan quellas exprerientschas tiel vargau. Mo tuttina: La redacziun dil «Catschadur Grischun» vegn era ad esser el futur la redacziun che vegn ludada ni criticada il pli fetg en nies casntun. La catscha grischuna ei (mo memia savens) emoziuns pur. Quella energia senta la redacziun ferm tochen vehement sch’ei va als acturs per la derasaziun da lu finamiras e posiziuns. Ord vesta dalla suprastonza centrala less jeu perquei punctuar che nus undrein la lavuir dalla redacziun actuala ord ina vesta fetg differenziada. Il pensum d’ina redacziun verdeivla eis ei numdadiu dad era plidentar tematicas meins emperneivlas. Che quei plai buca adina a singuls representants d’interess schai medemamein ella natira dalla caussa. Risguardond igl entir intervegnel jeu denton regularmein, che nossa gasetta gauda enteifer e schizun ordeifer ils cunfins da nies cantun stema ed admiraziun sco gasetta da catscha e natira.
Ina situaziun da win-win
Sco uniun vitala che funcziunescha ei il BKPJV avisaus sin la gasetta «Catschadur Grischun», la quala fa mintga onn in cert gudogn. Sper la part redacziunala ein ils inserats ina part interessanta dil «Catschadur Grischun», dad ina vart ord vesta dils lecturs, da l’autra vart era ord vesta finanziala. Igl ei nies giavisch da tgirar e schazegiar nos inserents. Drizzei vossa attenziun a quellas fatschentas che insereschan el «Catschadur Grischun». Plinavon persequitein nus la pratica dad enteifer il BKPJV far negina reclama da concurrenza per ils fideivels inserents dil il «Catschadur Grischun».
Sco catschadurs, sco lecturs ed accumpignaders critics engraziel jeu a vus per il sustegn enviers il BKPJV e giavischel a vus en vesta agl atun bunas preparativas e grond plascher anticipau.
Tarzisius Caviezel Präsident BKPJV
